日期:2015-08-05

水域:北水
天氣:天晴,微風2級,非常酷熱

流水:水漲,冇流

釣組:08pe連接(fg結)2號子線,快扣,餌木或鐵板

釣餌:餌木,鐵板

釣穫:油甘仔

今日既天氣非常之好天,藍天白雲。因為今日放假,所以就約左2位朋友去荔枝莊fit下魷同拖青物,好耐冇去過荔枝莊啦!今朝早6:30起身,8:00到大學火車站,先在大學站既美心餐廳外面會合朋友,順便買排方包餵下d狗仔!同朋友會合完之後就一齊步行去馬料水碼頭,由大學火車站去馬料水碼頭約15分鐘左右(所以提早半合鐘,因為8:30有船去荔枝莊)。到達馬料水碼頭之後上船先食個早餐,等待左10分鐘左右開船,(由馬料水碼頭去荔枝莊碼頭大約40分鐘左右,途經深涌碼頭,船費港幣18元單程票)。行船途中,大家都準備set定架生,經過40分鐘後,終於到達荔枝莊碼頭,在碼頭上有一群狗仔迎接我地(好cute呀!d狗仔)!因之前已經在船上set好竿,所以一到達就玩得啦!

一開波當然係fit下魷先,fit左一陣,冇魷訊,突然有位師兄係拖假餌中左條油魽仔!之後唔理三七廿一即刻轉鐵板仔掟出去jig,jig到上水面見有2條油魽仔追我塊鐵板仔,唔中,再jig多幾下,見到佢食鐵板仔(因戴左偏光鏡,所以睇得好清楚),一抽,中了!!!

荔枝莊釣行-榮仔-1

好爽呀!出drag滿弓,之後一野抽佢上地下,係油魽仔!!!(雖然唔係太大條,但起碼有得過下手癮先)

荔枝莊釣行-榮仔-3
荔枝莊釣行-榮仔-4

之後諗住再jig下,見到有野追,但唔咬啦!所以就攞番餌木去fit下魷先。見到群小朋魷在水面上不動就攞1號餌木fit,掟出去,有幾隻手板size衝出黎攬蝦,一chok, 爆鬚,第二槍中,手板size,因太細條已放生,之後群小朋魷就不知所蹤了。冇幾耐我朋友中左2隻小朋魷,然後就一直冇魷訊了。見冇咩野攪有d悶,就攞d麵包餵下d狗仔先,佢地好似好肚餓,將我d麵包食到一乾二淨, 哈哈!!!

過咗一陣後再jig下鐵板仔,發覺都係冇咩魚訊,而且不太追鐵板仔(活性有d低)。Jig 咗一陣見差唔多11:00,就諗住搭船去塔門睇下有冇景先,但一睇船期表,發現原來下午3:45先有船去塔門呀!同朋友考慮完最終決定唔去啦(因為去到塔門,都差唔多4點,係回程既時間)唔去塔門,我地就準備收拾好架生,等11:40個班船返馬料水,準備回程。等咗一陣,終於望見到有船黎荔枝莊碼頭,上咗船番去馬料水碼頭(由荔枝莊碼頭去馬料水碼頭大約40分鐘左右,船費港幣18元)。經過40分鐘既船程,終於到馬料水碼頭,之後同朋友一齊步行返大學火車站搭火車回家(由馬料水碼頭步行去大學火車站大約15分鐘左右),到達大學火車站,解散,各行各路,今日既釣行終於完結,好開心呀!(因為第一次jig中油魽仔咋)

Master Wing榮師傅

Master Wing榮師傅

榮仔,年輕新一代釣手,不知何時被人起了個花名叫榮師傅後,便一直被朋友稱為榮師傅,活躍於EGI界,近日更鐘情於前打,每日都不停鑽研新的釣具及釣技。
Master Wing榮師傅

Latest posts by Master Wing榮師傅 (see all)