日期:15/5 /2016

地點:北水至東水一帶

艇家:銀牌艇神豪仔

釣獲:約30隻良形及食用Size,放生約10隻。

自從上次破咗龜之後,小妹好耐都冇出艇釣魷魚啦,今日會長話要出去玩,仲要係豪神艇喎!有位,咁小妹點都要去啦!

之前又係一直擔心會落雨,因為千人台話星期日會狂風暴雨(咁又冇咁誇張嘅),所以小妹做足雨人準備!(落雨?我慣啦!T_T)但今日完全係俾千人台呃咗,小妹曬到燶咗=_=……..(下次記得提自己,無論幾大雨都好,都要帶定防曬!)

講番個釣行先,今日上咗豪神艇之後,一直出繩網之前都好風平浪靜,天陰陰咁,點知過咗繩網外,就開始坐過山車咁,Nano伯伯坐船頭,差d成個彈起咗飛落海呀!(講笑咋佢咁重飛唔起)不過話時話,豪神手艇真係利害,扭一下,化咗個浪,扭一下,又化一個,好快~我地就到咗大浪灣啦!

我地去咗幾個位,豪神話有魷就有魷,仲親自示範比小妹睇添,一拋杆就中咗隻良型魷。之後同行的朋友都各自中魷,每個位都有幾隻!

15052016-Fit魷-01

Nano伯同呀杉都雙雙中魷

噫?啲魷魚係咪唔記得咗小妹? 定係小妹件新衫殺氣太重,所以佢地唔食我隻蝦呢?(題外話,早前訂造的特別版全職釣手x HKEGI衫話咁快就有貨了,所以立即著住黎Fit fit)

Nano伯中咗魷魚之後都立即拎住佢地同件新衫好神氣地合照,仲要咬住支杆添。得啦,型啦(結果係好似咬咗啲牙印落支杆度囉XD)

15052016-Fit魷-05

得啦得啦,型啦, Nano 伯

15052016-Fit魷-02

Nano伯都著住佢自己設計嘅自私釣留影

快到十一點的時候,太陽越來越曬,小妹終於覺得支杆有點重,攪起來一睇!

15052016-Fit魷-07

噫?! 點解嘅?

………點解咁細隻咖,同行的朋友都笑小妹……..隻蝦係隻魷魚嘅1.5倍……….小妹唯有表演了一個完美嘅放生………係依個時候,豪神中咗隻34cm嘅大魷,隻魷一爆,加上支tiprun 杆頭,玩味十足,小妹諗起自己隻BB魷,很是葡萄。

15052016-Fit魷-03

豪神與34cm大魷

15052016-Fit魷-04

希人牙膏魚尺!依隻魷個名叫做葡萄~

題外話, 希人牙膏魚尺亮相~

15052016-Fit魷-06

呀杉都唔執輸, 示威一下!

再次轉了位置,終於!有一下有重量嘅拉力,中魷了!雖然隻魷魚不太大,但係都好開心,當小妹拎起佢諗住影相的時候,有人叫小妹轉一下隻魷,影佢正面會靚啲,點知咁就中伏了……一轉,隻魷就立即噴墨…………..小妹成臉都係啊…俾佢地笑顏射!

15052016-Fit魷-08

中咗伏, 睇下我隻手!

再題外話,今日上的魷魚噴發力都十足,有好幾次都波及無辜,全船人都不能避免,戰績斑斑!

15052016-Fit魷-09

XD 噴墨過程

忽然間,我們艇後面有煙仔打水!大家立即換上鐵板,小妹都好叻咁中咗一條,比佢啦住走嘅感覺爽呀!但由於經驗不足,攪得唔夠快,以為甩咗,後來比條魚走咗落船底及𠝹走咗我塊鐡板,好可惜呀!其後我地都冇再預到煙仔啦。

中午過後,太陽越來越曬同十分熱,小妹又冇咩收穫,但同行朋友keep住每個位有兩三隻魷魚,而小妹有d中壓同中暑,所以就躲番入艇內休息下,睇住大家玩。休息過後,又再出動了。係有一個位,Nano伯,呀杉同金師傅都先後同時中魷一齊影相。

15052016-Fit魷-10

小妹係後面好努力!

魷魚的size 都比較大嘅,大家叫小妹比d耐性第隻姣蝦係底耐少少先做動作,小妹好听話嘅,佢地一講完,我隻攪就係咁出drag啦!!!吱吱吱吱吱~哇睇來中咗隻大魷魚!收佢埋來的期間佢都爆咗好幾次,玩到我隻手都痛痛地。終於上咗水啦,唔該哂呀杉師兄幫手。

15052016-Fit魷-11

35cm巨物真係好好玩呀

15052016-Fit魷-12

小妹的35cm紀錄魷!

量度一下,哇,35cm,係小妹的紀錄魷呀!好開心!

15052016-Fit魷-13

4個連續中魷,大家一齊影合照

15052016-Fit魷-15

之後小妹都有中多隻魷

華安師兄都好利害,听聞佢早一日玩完通宵直踩來fit魷,佢係船上面好安穩咁瞓咗一段長時間,之後一起身,第一槍就中魷啦!後期我地轉咗幾個位,都係得師兄中魷!我地唯有企定定係度,欣賞佢嘅英姿。途中一路釣時,都不時釣到細型的小朋魷,我們都自動放他們落海,叫他們的父母長輩出來吧。

15052016-Fit魷-14

手快利落咁捉住咗隻魷啦

很快來到了釣行的尾聲了,我地都轉咗下鐡板jig石狗公,不過今日冇咩收獲,天色都開始轉暗了,我地就決定收杆回程了。回到豪神的魚排後,把魷魚拎上去影合照。

15052016-Fit魷-17

Size 都不錯~

今次釣穫算不錯了約有三十隻,放生約十隻,而我同時包辦最大同最細魷獎。回岸後硬係覺得唔夠喉,好想繼續釣呀! 希望下次小妹可以釣多啲,玩耐啲啦。

15052016-Fit魷-18

大合照

15052016-Fit魷-19

當然唔少得新衫的合照!

15052016-Fit魷-20

仲有同埋豪神加大魷留影~

想第一時間取得本網站最新資訊及釣魚資料分享,記得Like我們的Facebook專頁呀!
www.facebook.com/Crazyfishhunter

Chloe

Chloe

釣魚Fit魷新手, 近期龜氣十足, 為求破龜之法四出尋訪各大男神! 呀唔係, 係各大釣魚達人。現正踏上破龜之路.........希望.....
Chloe

Latest posts by Chloe (see all)